2026-05-02
Хэрэв та Европ, Ази гэсэн хоёр тивийг залгасан, түүх, соёл, байгалийн гоо үзэсгэлэн нь хосолсон улс руу аялахыг хүсвэл Турк улсыг сонгоорой. Византийн болон Оттоманы эзэнт гүрний (Осман ч гэсэн болно) өлгий байсан энэхүү нутаг өнөөдөр дэлхийн өнцөг булан бүрийн аялагчдын хамгийн их зочилдог газруудын нэг юм. Мөн эртний Грек, Ромын соёл иргэншлийн өв, түүхэн дурсгалт газар олонтой.
Турк жилдээ 15 сая орчим жуулчин хүлээн авдаг, аялал жуулчлалын салбар өндөр хөгжсөн улс юм. Нийтийн тээврийн хэрэгсэл (автобус, трамвай, метро) гадны хүмүүст ойлгомжтой. Зочид буудал, тээвэр, үзвэр үйлчилгээ гээд олон зүйлийг урьдчилан захиалж болно. Үйлчилгээний зохион байгуулалт болон соёл сайн, ихэнх газруудад англиар ойлголцоно. Туркууд найрсаг хүмүүс, гудамжинд танихгүй хүнээс зам асуухад тусална.
Яагаад Монголчууд аялахад тохиромжтой вэ?
Монгол болон Түрэг угсаатнууд нь Евразийн их тал нутагт олон зуу, мянган жилийн турш зэрэгцэн оршиж, түүх, ахуй соёлоор холбоотой байж ирсэн билээ.
Монголын иргэд Турк улсад 30 хоног дотор визгүй зорчиж болно, байнгын шууд нислэгтэй. Зуны ид халууныг үл тооцвол цаг агаар нь бидний хувьд тааламжтай, хоол нь амттай (махан хоол түгээмэл), байгаль сайхан, түүх соёлын хувьд үзэх харах зүйл тун олон.
Турк улс нэхмэл эдлэл, арьс шир, бэлэн хувцасны дэлхийн томоохон үйлдвэрлэгч тул шоппинг хийхэд тун тохиромжтой. Өргөн сонголттой, үнэ хямд талдаа. Ачаа багатай яваад чемоданаа дүүргэж ирнэ гэж тооцох зөв.
Турк руу хэдийд аялахад тохиромжтой вэ?
Турк манайхтай ижил 4 улиралтай, гэхдээ хамаагүй дулаахан. Хавар, намар цаг агаар зөөлөн, 20-25 хэм орчим. Зун халуун (30-35 хэм орчим) тул далайн эргийн амралтад илүү тохиромжтой. Өвөл сэрүүвтэр 5-10 хэм орчим дулаан, Монголын хавар, намрын хувцас тохирно. Гэхдээ чийглэг тул илүү жиндүү.
Турк хоол амттай юу?
Донэр, шиш, адана, искандер гээд олон төрлийн кебаб идэж болно. Гэхдээ Турк хоол гэхээр ганц кебаб бодож үл болно. Төв Ази, Ойрх Дорнод, Грек, Армен, Гүрж хоол Оттоманы эзэнт гүрний хоолны соёлд нэвтэрсэн байдаг. Хонь, үхэр, тахианы махтай олон төрлийн амттай хоол бий тул Монгол хүмүүст тун тохиромжтой. Турк ресторанд мөн шинэхэн барьсан талх, олон төрлийн мезе, жимс, амттан бий. Баклава, кунефе зэрэг амттан амсаж үзээрэй.
Загас, далайн хоолонд дуртай бол бол хоолойн эргээр загасны зах болон ресторануудаар зочлоорой (Истанбулын Еникапы порт дээр лав нэг бий).
Турк цай өтгөн, амт сайтай, өөрийн хэв маяг бүхий шилэн голдуу аяганд уудаг. Турк кофе өвөрмөц аргаар чанадаг, өтгөн хүчтэй амттай, эспрессо шиг жижиг аягаар ууна. Кофе их уудаг хүнд илүү таалагдана. Жирийн кофе уух бол Starbucks зочилж болно. Айран хэмээх тарагны ундаа бас түгээмэл.
Турк раки (архи гэдэг үг энэ үгнээс гаралтай) харин градус өндөр, ус, мөс хийхэд цайрдгаараа онцлог, өвөрмөц амттай (хуучны Пертуссин эмний амтыг санагдуулдаг).
Нийтийн тээвэр, такси
Турк улсын нийтийн тээврийн тогтолцоо их сайн ажилладаг. Истанбулд бол Istanbulkart метроны буудлуудаас худалдаж авч болох ба метро, автобус, трамвай, усан онгоцоор зорчиж болно.
Таксинд тоолуур асаалттай явж байгаа эсэхийг шалгаарай, эсвэл апп ашиглаж болно. Гэхдээ том хот түгжрээ ихтэй тул трамвай, метро илүү хурдан байж чадна. Трамвайн гол чиглэл (Т1) нь Султанахмет, Гранд Базар, Эминөнү, Кабаташ зэрэг бүх гол газруудыг холбодог.
Мөн Таксим – Бэшикташ, Таксим – Кадыкөй гэх мэт тогтсон чиглэлийн дагуу зорчигчдоо дүүргээд хөдөлдөг долмуш хэмээх Турк микро бий. Автобуснаас хурдан, таксинаас хямд. Бэлэн мөнгөөр төлбөрөө хийнэ.
Истанбул – хоёр тив, нэг хот
Истанбул Европ, Ази хоёр тивд оршдог. Византийн нийслэл байхдаа Константинополь нэртэй байсан бол 15-р зууны дундуур байлдан дагуулагч хэмээх II Мехмед султан эзэлснээр Османы эзэнт гүрний төв болсон түүхтэй. Netflix дээр Watch Rise of Empires: Ottoman цувралаас энэ түүхэн үйл явдлыг дүрсэлснийг үзэж болно.
Хар далайг Марморын тэнгистэй холбох Босфорын хоолой хотыг хоёр хэсэгт хуваадаг бөгөөд та гатлага усан онгоцоор хэдхэн минутын дотор нэг тивээс нөгөө тивд очиж болно. Турк улсын нийслэл биш хэдий ч хамгийн том (15 сая хүн оршин суудаг), эдийн засаг, соёлын төв нь болох хот юм.
Аялах хамгийн тохиромжтой газар бол Султанахмет. Энд Византийн эзэн хаан Юстинианы 537 онд барьсан Софийн цогчин дуган (Аяа София) байдаг. Оттоманы үед лалын сүм болгон өөрчилж, орчин үед харин музей болсон. Түүний асар том бөмбөгөр орой, византийн үеийн Христийн мозайк, Исламын калиграф хослол нь үнэхээр гайхалтай.
Хажуухан талд нь Цэнхэр сүм (Султан Ахмет сүм) бий. Цэнхэр өнгийн Изник хавтангаар бүрхэгдсэн дотоод заалаараа алдартай. Орж үзэхийн тулд мөр, гар, хөл далд хувцаслах хэрэгтэй, эмэгтэйчүүдэд нөмрөх алчуур өгдөг. Хоёр сүмийн хооронд Султанахмет талбай байх бөгөөд эртний Египетийн обелиск, Грекийн могойн багана зэрэг олон түүхэн дурсгал бий.
Алхаад очих ойрхон зайд Топкапы байх ба энэ нь Османы султануудын 400 жилийн турш оршин сууж, засаглаж байсан ордон юм. Асар том цогцолбор дотор ордны танхимууд, сан хөмрөг, зэвсгийн музей, хатад болон татвар эмсийн харем зэрэг байдаг.
1км орчим зайд дэлхийн хамгийн том, эртний зах Гранд Базаар бий. Дэлхийн хамгийн том, хамгийн эртний хаалттай зах бөгөөд 61 гудамж, 4000 гаруй дэлгүүртэй. Эндээс керамик, үнэт эдлэл, гар урлал, гоёл чимэглэл, бэлэг дурсгал худалдан авч болно. Хажууд нь халуун ногоо, амттан, цай, кофе, хуурай жимстэй зах бий. Захаас юм авахдаа үнээ ярьж татах хэрэгтэй.
Хотын төв, худалдааны гудамж, дэлгүүр, бар орох бол Таксим талбай, түүнийг тойрсон хүний хөл хөдөлгөөн үл тасрах дүүрэг бий. Мөн Галата цамхаг, Долмабахче ордон, Босфорын гүүр гээд зочилж болох өөр олон газрууд бий. Босфорын хоолойгоор усан аялал хийж зургаа авахуулж бас болно.
Истанбул хотод шоппинг хийхэд тун тохиромжтой. Mall of Istanbul, Cevahir, Marmara Forum, Istinye Park зэрэг олон худалдааны төвүүд бий.
Анталия хот
Туркийн өмнөд эрэгт орших Анталия хот нь Ром, Визант, Османы эзэнт гүрний түүхэн дурсгалууд, газар дундын тэнгисийн цэнхэр далай, наран шарлагын газрууд хосолсон, аялахад тун тохиромжтой газруудын нэг юм.
Хуучин хот буюу Калейчи нь Анталия хотын хамгийн эртний түүхтэй төв хэсэг юм. Ромын эзэн хаан Хадриан Анталия хотод айлчилсныг хүндэтгэн МЭ 130 онд барьсан гурван нуман хаалга бүхий цогцолбор нь Калейчи хотын гол үүд юм. Хаалгаар алхаж өнгөрөхөд орчин үеийн хот ард үлдэнэ. Дундад зууны үеийн нарийхан чулуун гудамжууд нь таныг эрт цаг үед аялах мэт сэтгэгдэл төрүүлнэ.
Дуден хүрхрээ нь хотын ойролцоох дунд ойн дунд орших ба цэнгэг сэрүүн ус нь хадан цохионоос шууд далай руу цутгадаг. Мөн Ювелит дуган, Хидирлик цамхаг, Анталия музей зэрэг зочлох хэрэгтэй олон газар бий.
Памуккале
Памуккале бол дэлхийн хамгийн ер бусын байгалийн үзэсгэлэнт газруудын нэг бөгөөд анх харсан хүн бүрийг гайхшруулдаг, үнэхээр мартагдашгүй дурсамж үлдээдэг. Туркийн өмнөд нутагт орших ба олон мянган жилийн туршид уулын энгэрээр урсах халуун рашааны шохойн хурдасны үр дүнд үүссэн, гайхамшигт цагаан шохойн дэнж юм. Энд гуталгүй алхах бөгөөд гүехэн усанд хөлөө дэвтээх нь тайвшруулах үйлчилгээтэй.
Хариополис эртний хотод Ромын театр, халуун усны газрын нуранги, Грек-Ромын үеийн 1200 гаруй чулуун авс бүхий том оршуулгын бий. Театр нь 15,000 хүний суудалтай бөгөөд уулын бэлд оршдог Памуккале хөндийн гайхамшигт үзэмжийг чимдэг.
Клеопатра эртний усан сан нь халуун рашаантай бөгөөд усан дотор эртний багана, чулуунууд бий. Домогт өгүүлснээр Египетийн хатан хаан Клеопатра энэ усанд сэлж байсан гэдэг. Хэрэв өндрөөс айдаггүй бол Памуккалед агаарын бөмбөлгөөр аялж болно.
Турк руу хэрхэн аялах вэ?
Хэрэв та эсвэл хамт явах хүмүүс олон улсаар аялсан туршлагатай, хэл устай эсвэл өмнө нь Турк очиж байсан бол бие даан аялахад болохгүй зүйлгүй. Ялангуяа аяллын шахуу хөтөлбөрт баригдах дургүй, өөрийн сонирхлоор эрж хайж, олж үзэх дуртай хүмүүст илүү тохиромжтой.
Очих газруудаа онлайнаар сайн судалж өдөр, өдрийн төлөвлөгөө гаргахыг зөвлөж байна. Аяллын төсөвт тийзийн үнэ, олдоц бас нөлөөлдөг тул онгоцны тийзээ аль болох эрт захиалах нь зөв. AirBnB зэрэг онлайн платформуудаар байр захиалж болно.
Хэрэв та Турк руу анх аялж буй, мөн аяллын нарийн төлөвлөгөө гаргах сонирхол байхгүй бол аяллын агентлагуудын хөтөлбөр сонгож болно. Турк улсын 3 хотын 8 өдөр 7 шөнийн аялал санал болгож буй зарим аяллын компаниудаас жагсаалаа. Хэзээ аялах, ямар зэрэглэлийн зочид буудал, резорт сонгох зэргээс голдуу үнэ нь хамаарна. Та аяллын компаниудтай холбогдон дэлгэрэнгүй мэдээлэл аваарай.
- Хаан Трэвел: 4,690,000₮
- ITAAS Travel: 4,550,000₮ – 5,400,000₮
- Дэлхий Трэвел Х: 4,590,000₮ – 4,890,000₮
- Монгол аялал: 4,490,000₮ – 5,500,000₮
- Mix Travel: 4,500,000₮
- JED Future Travel: 4,490,000₮ – 5,590,000₮
- Алтан тур: 4,590,000₮
- CI TOURS: 4.390.000₮
- New Value Travel: 4,990,000₮ –
- Их Монгол Трэйвэл: 4,590,000₮
- Турк аялал: 4,490,000₮ – 4,990,000₮
Жич: Бид дээрх байгууллагуудын олон нийтийн сувгууддаа байршуулсан мэдээллийн үнэн зөв байдал, өөрчлөлтөд ямарваа хариуцлага хүлээхгүй болно. 2026 оны 5-р сарын 3-ны өдөр шинэчлэв.
Турк улсад хэрхэн дататай аялах вэ?
Аялж явахад гэр орныхон, найз нөхөдтэйгээ харилцах, зураг бичлэг илгээх, видео дуудлага хийх, газрын зургаас байршил хайх, бичлэг, мэдээлэл үзэх гэх мэт хэрэглээ мундахгүй. Өмнө нь бид очсон улсынхаа sim худалдан авч хэрэглэдэг байсан нь багцын дата бага, хугацаа, дуудлага, SMS ашиглахгүй илүү мөнгө төлдөг сул талуудтай байсан. Бас худалдаж авах газраа хайж олох, үүрэн холбооны оператор сонгох, олон багцуудаас сонгох, очерлох, бичиг баримтын мэдээллээ бүртгүүлэх гээд цаг орсон төвөгтэй ажил байсан.
Харин одоо үед та утсандаа аяллын дата eSIM суулгаснаар аяллын турш хүссэн хэмжээгээрээ интернэт хэрэглэж чадна. eSIM онлайнаар худалдаж аваад гэртээ байхдаа суулгачихна. Турк улсад ирээд сүлжээнд холбогдон рөүминг асаахад интернэтэд холбогдоно. Аялал дууссаны дараа утсан дээрээсээ eSIM устгана.
Ямар дата багцтай eSIM худалдаж авах нь таны аяллын хугацаа, бас хэрэглээнээс хамаарна. Хэрэглээ багадуу бол нэг өдөрт 1GB орчим дата хэрэглэхээр тооцож болно. Та ажил, гэртээ байдаг шигээ Wi-FI хэрэглэхгүй гэдгээ энд бас тооцох хэрэгтэй. Жишээ нь: 7 хоногийн 10GB дата (25,900₮). Хэрэглээ ихдүү бол нэг өдөрт 3GB орчим дата хэрэглэхээр тооцож болно. Жишээ нь: 7 хоногийн 20GB дата (44,900₮). Их өндөр хэрэглээтэй бол хязгааргүй багц авч болно.
Илүү богино эсвэл урт хугацаагаар аялж буй бол өдрөө сонгоход боломжит датаа сонголтууд гарч ирнэ. Турк eSIM хоног нь цагийн UTC0 бүсийн хуанлийн хоногоор тооцогддог тул нэг хоногийн нөөцтэй авахад буруудахгүй. 7-8 хоног аялж буй бол 10 хоногийн багц авахыг зөвлөх ба үнийн хувьд тун ойролцоо байдаг. Жишээ нь: 10 хоногийн 20GB дата 45,900₮.
Хяналтгүй их хэрэглээд дата эрт дуусах вий гэж болгоомжилж байвал өдөр бүрийн дататай багцуудаас сонгож болно. Жишээ нь: 10 хоногийн өдөр бүр 3GB багц (₮59,900). Тухайн өдрийн датаа дуусахад хурд буурах ба маргааш нь дахин шинэ дататай болох тул огт датагүй болоход санаа зовохгүй. Бас санамсаргүй хэт их хэрэглэхээс хязгаарлах нэг арга гэж харж бас болно.
Бид 2026 оны 5-р сарын 31 дуустал нээлтийн онцгой хямдрал зарласан байгаатай танилцаарай. Баярлалаа.
